လုပ်သက်ဆုကြေး ဘယ်လိုတွက်သလဲ

ကိုဝိုင်းကြီး ထွဲဂျစ်ကွမ့် ဘယ်လိုတွက်သလဲဗျ
သမ္မတ နိုမုဟျောန်း လက်ထက်မှာတော့ အင်န်ဂျီအိုတွေ ငွေ ရွှင်ခဲ့လို့ ၊ ရွှေ့ပြောင်းအလုပ်သမားများ သိမှတ်စရာ အဖြာဖြာတို့ကို နည်းလမ်းပေါင်းစုံနှင့် အခမဲ့ ဖြန့်ဝေခဲ့ကြပါတယ် ။ အဲသည်ခေတ်မှီလိုက်သူ တော်တော်များများ ကတော့ ရွှေ့ပြောင်းအလုပ်သမားတို့ သိအပ်ဖွယ်ရာများ တော်တော်လေး သိခွင့်ရခဲ့ကြပါတယ် ။ သို့သော်လည်း ပဲ အကြောင်းအမျိုးမျိုးကြောင့် သိမှတ်စရာများ သိဖို့ မှတ်ဖို့ ကျန်ခဲ့သူတွေရှိနေတာကိုလည်း တွေ့ရပါတယ် ။ ကိုရီးယားရောက်တာ ဆယ်စုနှစ် ၂ ခုနည်းပါးရှိနေပြီဖြစ်တဲ့ မိတ်ဆွေရင်း ၁ ယောက်က မနေ့တစ်နေ့က အမေးတစ်ခုရှိလာပါတယ် ။ “ကိုဝိုင်းကြီး ထွဲဂျစ်ကွမ့် (လုပ်သက်ဆုကြေး) ဘယ်လိုတွက်သလဲဗျ” တဲ့ ။ သိသလောက်မှတ်သလောက်ရှင်းပြရပါတယ် ။ အကြောင်းအမျိုးမျိုးကြောင့် မသိဘဲ ကျန်ခဲ့သူ ကိုရီးယားရောက် မြန်မာ မိတ်ဆွေများအတွက် ကိုယ့်လုပ်သက်ဆုကြေး ကိုယ့်ဟာကိုယ်တွက်ကြည့်တတ်စေဖို့ လုပ်သက်ဆုကြေး တွက်နည်း တင်ပြလိုက်ပါတယ်ခင်ဗျာ ။

လုပ်သက်ဆုကြေးရထိုက်သူ
- အလုပ်သမား(သူဌေးမပါ) အနည်းဆုံး ၅ ယောက်ရှိတဲ့ အလုပ်ရုံ / စက်ရုံ ဖြစ်ရပါမယ် ။
- အဲသည် စက်ရုံမှာ အလုပ်ဝင်တာ အနည်းဆုံး ၁ နှစ်ပြည့်ရပါမယ် ။ (နေ့တစ်ပိုင်းလိုရင်လည်းမရပါ)
ရထိုက်သော လုပ်သက်ဆုကြေး
နောက်ဆုံးထုတ်လစာ ၃ လစာရဲ့ ပျမ်းမျှလစာ နှုန်းဖြင့် လုပ်သက်ရှိသလောက် ။ (ပျမ်းမျှ ၁နှစ်ကို ၁လစာလို့ မှတ်ရင်ရပါတယ် ။ ၁နှစ်မပြည့်ရင် လုပ်သက်ရက်ပေါင်းကို ၃၆၅ နှင့်စားပြီး ထွက်လာတဲ့အဖြေကို ယူပါသတဲ့ ) ဟန်းဂုရွာမှာ အထွေထွေအလုပ်သမားအဖြစ် 12-10-2009 နေ့မှ 11-10-2010 နေ့အထိ အလုပ်လုပ်သွားတဲ့ အလုပ်သမားတစ်ယောက်ရဲ့ လုပ်သက်ဆုကြေးကို နမူနာအဖြစ် တွက်ပြထားပါတယ် ။ (ရွာသူကြီးမင်းရဲ့ ကိုယ်ရေးအတွင်းရေးမှူးမလေးဆီက မိတ္တူတစ်စုံ တောင်းယူပြီး တင်ပြလိုက်တာပါ ။ သူကြီးမင်းမသိစေနှင့်လို့ တော့ မှာခဲ့ပါတယ် ။ )
ပျမ်းမျှလစာ ဘယ်လိုတွက်မလဲ
အဲသည် အလုပ်သမား အလုပ်ထွက်သွားတဲ့ 11-10-2010 ရက်မှ နောက်ဆုံး ၃ လ (12-7-2010 မှ 11-10-2010 အထိ) အတွက် လုပ်ခကို အရင်တွက်ယူပါတယ် ။ အဲသည်ကာလမှာ ရခဲ့တဲ့ မူရင်းလစာ ၊ အချိန်ပိုလစာ ၊ ဘောနပ်စ် ၊ ထမင်းစရိတ် အစရှိသဖြင့် ရခဲ့တာတွေ အားလုံးထည့်တွက်ရသတဲ့ဗျ ။ တွက်လိုက်တော့ သည်လို ထွက်လာပါတယ် -

ပျမ်းမျှလစာ နှင့် လုပ်သက်ဆုကြေး
အဲသည် ၉၂ ရက်အတွက် ရတဲ့ လစာ စုစုပေါင်း 5,442,553 ဝမ် ကို ၁ ရက်စာ တွက်လိုက်တော့ (5,442,553/92=) 59,158 ဝမ်ရပါတယ် ။ အဲသည် တစ်နေ့ပျမ်းမျှ (နေ့တွက်) လုပ်ခကို ရက် ၃၀ နှင့် မြှောက်လိုက်တော့ ပျမ်းမျှလစာ (59,158 X 30 = 1,774,740) ထွက်လာပါတယ် ။ အဲသည် ပျမ်းမျှလစာ ကို လုပ်သက် (လုပ်သက်ရက်ပေါင်းကို ၃၆၅ နှင့် စားပြီး ရသော အဖြေ) နှင့် မြှောက်လိုက်ရင် ရသင့်တဲ့ လုပ်သက်ဆုကြေးထွက်လာပါသတဲ့ ခင်ဗျာ ။
(ပုံကြီးကြီးကြည့်ချင်ရင် ပုံကို ကလစ်ပြီး ကြည့်ရပါတယ် ။ အဲသည် ပုံကို ပီဒီအက်ဖ် ဖိုင်နှင့် ကြည့်ချင်ရင်တော့ ဒီမှာကလစ်ပြီး ကြည့်လို့ရပါတယ်)
လုပ်သက်ဆုကြေးများများရအောင်
ဂလိုဆိုတော့ ၊ အလုပ်ထွက်ခါနီးနောက်ဆုံးလတွေမှာ အချိန်ပိုများများဆင်းခဲ့ရင် လုပ်သက်ဆုကြေး များများရမယ့် သဘောပါပဲ ။ အချို့သူဌေးများ သဘောပေါက်လွန်းလို့ အလုပ်ထွက်ခါနီးမောင်တွေကို အချိန်ပို မခိုင်းတော့ဘဲ အနား ပေးကြတာ များသတဲ့ခင်ဗျာ ။ သူဌေးမင်း အချိန်ပို မခိုင်းတော့လည်း အဲသည်ကာလမှာ အလုပ်ပျက်ရက် မရှိစေနှင့်ပေါ့ဗျာ ။
ကိုကိုအီးပီတို့ရဲ့ လုပ်သက်ဆုကြေး

ကိုရီးယားသူဌေးမင်းများဟာ ကိုကိုအီးပီတို့အတွက် လုပ်သက်ဆုကြေးအာမခံ မထားမဖြစ် ထားကြရတာမို့ ၊ အာမခံကုမ္ပဏီ (ဆမ်ဆောင်း ရေကြောင်းနှင့်မီးအာမခံ) ဆီက လုပ်သက်ဆုကြေးအာမခံငွေကို ပြန်တောင်း ယူကြ ရပါတယ် ။ လုပ်သက်ဆုကြေး ကို အပေါ်မှာ တွက်သလိုတွက်ပြီး ထွက်လာတဲ့အတိုင်း ကိုကိုအီးပီတို့ကို ပေးရမှာ ဖြစ်ပါတယ် ။ တစ်ချို့ သူဌေး အာမံငွေကို ကိုကိုအီးပီများထံ တိုက်ရိုက်ထုတ်ပေးပြီး ၊ လိုတာကို ထပ်ဖြည့်ပေးတာလည်း ရှိတယ် ။ သို့ပေမယ့် တစ်ချို့သူဌေး လုပ်သက်ဆုကြေးကိစ္စ လုပ် မပေးလို့ အာမခံကုမ္ပဏီဆီက ကိုယ့်ဟာကိုယ် တောင်းယူရတဲ့သူတွေလည်း ရှိတယ် ။ လိုငွေကိုလည်း ဖြည့်မပေးဘူး ။ ရှုပ်ရှုပ်ရှက်ရှက် မလုပ်ချင်ကြလို့ ရသလောက်လေးယူပြီး ကျေနပ်လိုက်ရတာ တွေလည်း ရှိသတဲ့ ။ ကိုကိုအီးပီတစ်ချို့များ အာမခံထားတဲ့ငွေရော ၊ သူဌေးပေးတဲ့ လုပ်သက်ဆုကြေးပါ ၂ မျိုးစလုံး ရမယ် လို့ ထင်နေကြတဲ့ သူတွေလည်း ရှိပါတယ် ။
ကဲ ၊ သည်တစ်ခါတော့ ကိုယ်ရမယ့် ဆုကြေးကိုယ့်ဟာကိုယ်တွက်ကြည့်တတ်ရော့ပေါ့ ။
(ရသင့်တာတွေ ရကြပါစေဗျား)

လေးစားမှုဖြင့်-
ကိုဝိုင်း(မိုးညှင်း)