Thursday 17 April 2014

ကိုရီးယား အီးပီ လုပ်သားတိုင်း သိထားသင့်သော ပြည်ထွက်အာမခံကြေး (၂)

စကားချီး
ဤ ဆောင်းပါးသည် ကိုရီးယားအစိုးရက လက်ရှိ မောင်းနှင်နေသော အီးပီစနစ်၏ အစိတ်အပိုင်း တစ်ခုဖြစ်သည့် ပြည်ထွက်အာမခံ (출국만기보험•신탁) စနစ် နှင့် လုပ်သက်ဆုကြေးစနစ် (퇴직급여제도) အကြောင်း မသိနားမလည်သေးသော ဆွေမျိုးပေါက်ဖော် သွေးချင်း ညီငယ် မြန်မာ အီးပီ လုပ်သားများအား မိမိ ဆည်းပူးလေ့လာ နားလည် တတ်သိထားသည်များကို ပြန်လည် မျှဝေ ရှင်းလင်းတင်ပြပေးနေခြင်းသာ ဖြစ်ပါသည် ။
ထို့ပြင် ကျနော်၏ တင်ပြချက်များသည် ကိုရီးယားအီးပီစနစ်အား ကောင်း၏ သို့မဟုတ် ဆိုး၏ ဟု ဆိုလိုခြင်း မဟုတ်မူဘဲ ၊ အီးပီစနစ် မောင်းနှင်နေပုံကိုသာ တင်ပြနေခြင်းဖြစ်ကြောင်း သတိမူကြစေလိုပါသည် ။

*****

လုပ်သက်ဆုကြေး (퇴직급여) ကို ဥပဒေ (အဟောင်း) အတိုင်း ဆက်လက်ထုတ်ပေးမည်
ကိုရီးယားအစိုးရဟာ လုပ်သက်ဆုကြေး (퇴직급여) ဥပဒေအား ပြင်ဆင်ထားခြင်း မရှိသည့်အတွက် ယခင် အတိုင်း ဆက်လက်ထုတ်ပေးသွားမှာ ဖြစ်ကြောင်း သိရပါတယ် ။
သည်တော့ ရပ်ကွက်ထဲမှာ ပြောနေကြသလို စက်ရုံ အလုပ်ရုံ ပြောင်းရင် ထုတ်မပေးဘူး ဆိုတာ မဟုတ်ပါ ။ စက်ရုံပြောင်းရင် ထွဲဂျစ်ကွမ့် ထုတ်မပေးတော့ ဒုက္ခရောက်နေမှာပေါ့ ဆိုပြီး တွေးပူနေကြတဲ့ သူတွေရှိပါတယ် ။ ထွဲဂျစ်ကွမ့်အတွက် လုံးဝစိတ်ပူစရာမလိုပါ ။
စက်ရုံ ၊ အလုပ်ရုံ တစ်ခုတည်းတွင် ၃နှစ်လုပ်ခြင်းမဟုတ်ပဲ ၁ နှစ်သာလုပ်ပြီး အခြားစက်ရုံသို့ပြောင်းလုပ်သည့် အလုပ်သမားများအနေဖြင့် ၊ လုပ်သက်ဆုကြေး (퇴직금) ကို ယခင် (သက်ဆိုင်ရာ) စက်ရုံ အလုပ်ရှင် ထံမှ တောင်းဆိုရပါမယ် ။ သက်ဆိုင်ရာ အလုပ်ရှင်သည် သက်ဆိုင်ရာ လုပ်သက်ဆုကြေးအား ၁၄ ရက်အတွင်း ထုတ်ပေးကြရမှာဖြစ်ပါတယ် ။ ထုတ်ပေးခြင်း မရှိပါက ဥပဒေအရ ဆက်လက် တိုင်ကြားတောင်းဆိုနိုင်ပါတယ် ။
အဲသလို တိုင်ကြားတောင်းဆိုရာမှာ အချိန် ဘယ်လောက်ကြာမယ် မသိ ဆိုပြီး ပြောဆိုနေကြခြင်းဟာလည်း အမှန်မဟုတ်ပါ ။ ကိုရီးယား နိုင်ငံမှာ အလုပ်ရှင် အလုပ်သမား ဖြန်ဖြေရေးအမှု (ဝါဏိဇ္ဈ ပဋိပက္ခအမှု) ကို ရက်ပေါင်း ၆၀ အတွင်း အပြီးဖြတ်ရမှာဖြစ်ကြောင်း ဥပဒေရှိပြီးသားပါ ။ (မပြီးပြတ်ပါက တရားရုံးသို့ ဆက်လက် တိုင်ကြားရမှာပါ။)
နောက်ပြီး ၊ ထွဲဂျစ်ကွမ့်ကို ပြန်လည်စစ်ဆေးနိုင်သည့် စနစ် မရှိဘူး ဆိုပြီး ရပ်ကွက်ထဲ အော်နေတာတွေလည်း ကြားနေရပါတယ် ။ အလုပ်ရှင်များ ထွဲဂျစ်ကွမ့် အာမခံထားရှိခြင်း ရှိမရှိ နှင့် သွင်းထားသော အာမခံကြေး မည်မျှ ရှိကြောင်း အောက်ပါ ဖုန်းနံပါတ်သို့ ဆက်သွယ်မေးမြန်း အတည်ပြုချက်ယူနိုင်ကြပါကြောင်း တင်ပြအပ်ပါသည် -
- Tel 02-2119-2400 သို့ ခေါ်ပါ ။
- လူကြီးမင်း အသုံးပြုလိုသည့် ဘာသာစကား ရွေးချယ်ခိုင်းပါလိမ့်မည် ။ (မြန်မာဘာသာမရှိသေးပါ ၊ ဆန္ဒပြပြီး တောင်းဆိုနိုင်ပါသည်။)
- ကိုရီးယားဖြင့် နားထောင်လိုပါက ၁ ကိုနှိပ်ရန်ဖြစ်ပြီး ၊ အင်္ဂလိပ်လိုနားထောင်လိုပါက ၂ ကိုနှိပ်ရန်ဖြစ်ပါသည် ။
- ၄င်းနောက် လုပ်ငန်းရှင်အနေဖြင့် မေးမြန်းလိုပါက လုပ်ငန်းရှင် မှတ်ပုံတင် အမှတ် ဂဏန်း ၁၀ လုံး နှင့် ရှပ် သင်္ကေတ (#) ကို နှိပ်ရမည်ဖြစ်ပြီး ၊ အလုပ်သမားအနေဖြင့် မေးမြန်းလိုပါက နိုင်ငံခြားသား မှတ်ပုံတင်အမှတ် ဂဏန်း ၁၃ လုံးနှင့် ရှပ်သင်္ကေတ (#) ကိုနှိပ်ရပါမည် ။ မိမိ နှိပ်သည့် ဂဏန်းအား ပြန်လည် ဖတ်ပြပါမည် ။ မှန်ကန်ပါက ၁ ကို နှိပ်ပြီး အတည်ပြုချက်ပေးရန်နှင့် မမှန်ပါက ၂ ကိုနှိပ်ပြီး ပြင်ဆင်ချက်ပြုရပါမည် ။
- ၄င်းနောက် ၊ မိမိနှင့် သက်ဆိုင်သည့် အာမခံကြေးကိစ္စများ မေးမြန်းရန် နံပါတ် ၁ ကို နှိပ်ရပါမည် ။ ထိုအခါ မိမိ သိရှိလိုသော အာမခံကြေး ကိစ္စများကို စေ့ငုစွာ မေးမြန်းနိုင်ကြောင်း တင်ပြလိုက်ရပါသည် ။

****

လုပ်သက်ဆုကြေးကို ဘယ်လိုထုတ်ပေးမလဲ ။
ဥပမာအဖြစ် တင်ပြပါမည် ။ ၁ လ ပုံသေ လစာ ၁၅ သိန်း ဖြင့် ၁ နှစ်တိတိ အလုပ်လုပ်ပြီး အလုပ်ပြောင်းမည့် အလုပ်သမား ၁ ယောက်၏ ထွဲဂျစ်ကွမ့် နှင့် ပြည်ထွက်အာမခံကြေးကို တွက်ချက်တင်ပြပါမည် ။
ရမည့် ထွဲဂျစ်ကွမ့်-
- 1,500,000 Won
- အသေးစိတ်တွက်နည်း (ဤတွင်ရှုပါ)
- အဆိုပါ လုပ်သက်ဆုကြေးကို အလုပ်ပြောင်းချိန်ဖြစ်စေ ၊ ကိုရီးယားမှ အပြီး ပြန်ချိန်တွင် ဖြစ်စေ သက်ဆိုင်ရာ အလုပ်ရှင်ထံမှ ဥပဒေနှင့်အညီ တောင်းခံရယူခံစားနိုင်မည်ဖြစ်ပါသည် ။
- တောင်းယူ၍ မရပါက ဥပဒေနှင့်အညီ အလုပ်သမားရုံးတွင် အမှုဖွင့်တိုင်ကြားခြင်း ၊ မပြေလည်ပါက တရားရုံး အဆင့်ဆင့် တွင် အယူခံတက်တိုင်ကြားခြင်း စသည်ဖြင့် ဆောင်ရွက်နိုင်ပါသည် ။
- ဗီဇာ ကုန်နေသဖြင့် ၊ အမှုမတိုင်ကြားနိုင်ဆိုသည်မှာ မသိသဖြင့် ပြောခြင်းဖြစ်သည် ။ ထိုကိစ္စများဆောင်ရွက်နိုင်ရန် အတွက် ၊ မူလ အီးနိုင်း ဗီဇာ ၅ နှစ်မှ ၂ လ ကို နှုတ်ထားသဖြင့် (၄နှစ်၁၀လဖြစ်သွား) သည်ကို သဘောပေါက်ပါလေ ။ (၂ လအတွင်း အမှုမပြတ်သော် ဗီဇာ ဆက်တိုးနိုင်ပါသေးသည် ။)

ရရှိမည့် ပြည်ထွက်အာမခံကြေး-
- 1,500,000 X 8.3% X 12 = 1,494,000 Won
- အဆိုပါ ပြည်ထွက်အာမခံကြေးကို မူ အလုပ်ရှင်ထံမှ တောင်းယူရန်မဟုတ်မူဘဲ ၊ အာမခံပေါ်လစီအား လက်ခံဆောင်ရွက်ပေးနေသည့် ဆမ်ဆောင်းအာမခံဌာနတွင် ၃ နှစ်အတွင်း တောင်းယူကြရပါမည် ။
- အကြောင်းအမျိုးမျိုးကြောင့် ၃ နှစ်ကျော်ပြီး မှ တောင်းဆိုလိုပါက ၊ ဆမ်ဆောင်းအာမခံဌာနတွင် တောင်းခံ၍ ရနိုင်တော့မည်မဟုတ်ပါ ။ အဆိုပါ မတောင်းဖြစ်သော အာမခံကြေးများကို ၁ လအတွင်း ကိုရီးယား လူသားအရင်းအမြစ်ဖွံ့ဖြိုးရေးဌာန (한국산업인력공단) သို့ လွဲပြောင်း ပေးထားမည်ဖြစ်သဖြင့် ၊ ၄င်းဌာနတွင် တောင်းယူရပါမည် ။
- သို့ရာတွင် ပြည်ထွက်အာမခံကြေးမှာ ၊ ပြင်ဆင်လိုက်သည့် အီးပီဥပဒေအရ ကိုရီးယားမှ ပြန်လည်ထွက်ခွါချိန် (သို့မဟုတ် ကင်းလွတ်ခွင့်ပြုထားသည့် အခြေအနေ) မှ သာ ထုတ်ပေးရမည်ဆိုသဖြင့် ၊ အလုပ်ပြောင်းချိန်တွင် ထုတ်ယူရရှိနိုင်မည် မဟုတ်ပါ ။

******

လုပ်သက်ဆုကြေး နှင့် ပြည်ထွက်အာမခံ ဘယ်လိုပတ်သက်နေသလဲ
အလုပ်ရှင်များအနေဖြင့် ၊ အလုပ်သမား အလုပ်ထွက်(ဆု)ကြေးအား အာမခံသည့် ဥပဒေ (근로자퇴직급여 보장법) အရ မိမိအလုပ်တွင် ၁ နှစ်နှင့်အထက် စဉ်ဆက်မပြတ်အလုပ်လုပ်ခဲ့သော အလုပ်သမားအား ၊ အလုပ်မှ ထွက် သို့မဟုတ် ပြောင်း ချိန်တွင် လုပ်သက်ဆုကြေးပေးရန် တာဝန်ရှိနေသလို ၊ အီးနိုင်းဥပဒေ (외국인 근로자의 고용등에 관한 법률) အရ လည်း မိမိ ငှားရမ်း အသုံးပြုသော နိုင်ငံခြားသား အလုပ်သမားများအတွက် ပြည်ထွက် အာမခံကြေးကို လစဉ်ပေးသွင်းရန်လည်း တာဝန်ရှိလာပါသည် ။ သို့ရာတွင် -
အီးနိုင်း ဥပဒေ ပုဒ်မ ၁၃ ပုဒ်မခွဲ၂ အရ ၊ အလုပ်ရှင်သည် ပြည်ထွက်အာမခံ အစရှိသည်တွင် အာမခံထားရှိပြီးဖြစ်လျင် အလုပ်သမား အလုပ်ထွက်(ဆု)ကြေးအား အာမခံသည့် ဥပဒေ ပုဒ်မ ၈ ပုဒ်မခွဲ၁ အရ လုပ်သက်ဆုကြေးစနစ်အား လိုက်နာဆောင်ရွက်သကဲ့သို့ မှတ်ယူမည် ။
//외국인 근로자의 고용등에 관한 법률 제13조
- ② 사용자가 출국만기보험등에 가입한 경우 「근로자퇴직급여 보장법」 제8조제1항에 따른 퇴직금제도를 설정한 것으로 본다. //
ဟုဆိုထားသဖြင့် ၊ လုပ်သက်ဆုကြေးကို ပေးရန်တာဝန်မှ ပြည်ထွက် အာမခံကြေးကို ပယ်နှုတ် ခုနှိမ်ပြီး ပေးချေခွင့် ရရှိသွားပါသည် ။

သို့ဖြစ်ရာ ၊ အထက် နမူနာပါ လုပ်သက်ဆုကြေးဖြစ်စဉ်တွင် ၊ အလုပ်သမားအနေဖြင့် လုပ်သက်ဆုကြေး ၁၅ သိန်း အပြည့်မရနိုင်တော့ဘဲ ၊ အလုပ်ရှင် မှ ပေးရန်ရှိ လုပ်သက်ဆုကြေး ၁၅ သိန်းမှ ၊ ပြည်ထွက်အာမခံကြေးအဖြစ် ပေးသွင်း အပ်နှံထား ငွေ ၁၄သိန်း ၉ သောင်း ၄ထောင် ကို ခုနှိမ်ပြီး ရရှိမည်ဖြစ်ပါသည် ။
အီးနိုင်း အလုပ်သမားအနေဖြင့် လုပ်သက်ဆုကြေးနှင့် ပြည်ထွက်အာမခံ ခြားနားငွေ [1,500,000 – 1,494,000 =](လုပ်သက်ဆုကြေး) ၆ ထောင်ကိုသာ လုပ်ငန်းရှင်ထံမှ ရရှိနိုင်မည်ဖြစ်ပြီး ၊ ကျန် ပြည်ထွက်အာမခံကြေး ကိုမူ ကိုရီးယားမှ ထွက်ခွါချိန်တွင် ထုတ်ယူရရှိနိုင် မည်ဖြစ်ပါသည် ။
ပြောင်းလဲလိုက်သော အီးပီ/အီးနိုင်း ဥပဒေအရ အလုပ်ပြောင်းချိန် ထွဲဂျစ်ကွမ့်ထုတ်မပေးရ ဆိုသည်မှာ မမှန်ပါ ။ ထို့ပြင် ထွဲဂျစ်ကွမ့်ကို ဆမ်ဆောင်းက ဘယ်နှရာခိုင်နှုန်းပေးရပြီး ၊ အလုပ်ရှင်က ဘယ်နှရာခိုင်နှုန်းပေးရမည် ဟု ရပ်ကွက်ထဲပြောဆိုနေသည်များမှာလည်း မှန်ကန်သော ကျမ်းထွက်စကား မဟုတ်ပါ ။

(ဆက်လက်တင်ပြပါမည်)

လေးစားမှုဖြင့်-
ကိုဝိုင်း(မိုးညှင်း)
၂၀၁၄၀၄၁၇

No comments: